أخبار عاجلة

حوار| رجل وعصا.. "مجذوب" مسجد "الطاهرة" لا يكشف سره

الأحمر والأخضر والأسود.. ثلاثة ألوان تزين عصاه الخشبي الذي يستند إلى جواره أمام مقام "رئيسة الديوان" السيدة زينب، يرى أن العالم أسرار يجب ألا نفصح عنها لمن لا نعرفهم، لا يهتم بمن يطلق عليه درويش أو مجذوب، فهو يسمي نفسه "محبًا وعاشقًا" لآل البيت والصالحين، معتزلًا لـ "حياة البشر" رغبةً في التقرب لرب البشر. 

اسمك إيه؟
مش مهم اسمي، ولا سني، المهم نفسي وروحي فيهم إيه.  

أنت بقالك قد إيه في المسجد؟ 

مش عارف بقالي كتير أوي، أو يمكن جيت إمبارح، مش مهم المدة؛ الحب مش بيتقاس بالزمن لأ ده بالدنيا كلها.

ونفسك وروحك فيهم إيه؟ 

رب الناس والنفوس هو اللي يعلم نفسي فيها إيه، وأنا هنا مع رب الناس، وخليكم أنتم برا مع الناس. 

طب بتعمل إيه هنا؟  

 أنا هنا عشان أعبد ربنا، وعشان أكون جنب "آل البيت" حبايبي بعشقهم وبحبهم، وعشان أقول لهم سري. 

وإيه هو سرك؟  

ماينفعش أقوله غير لما هم يأذنوا ليا بالكلام، الدنيا أصلا أسرار، وقصص "آل البيت" أسرار،  والواحد منا ماينفعش يكشف سره حتى لو اتهان واتبهدل، هو حب ربنا كدا ممكن الواحد منا يكون غني جدًا ويعتزل الدنيا عشان عايز يوصل لربنا وأهل بيت النبي. 


تقصد إن سرك وصلك لاعتزال الدنيا والناس؟ 

أنا كنت أرزقي على باب الله،  مقاول بشتغل اليوم بيومه بس تعبت من الناس والكلام معاهم، هجرت الدنيا كلها وما فيها "الناس وحشة". 

وبتتمنى إيه أمام السيدة زينب؟ 

بدعي من ربنا و "آل البيت" و"الطاهرة" السيدة زينب يحققوا لي أحلامي.

وإيه أحلامك وأمنياتك بالتحديد؟ 

هي أسرار ماقدرش أكشفها لك زي ما قولتلك لو كشفت السر أضر، علاقتي بيهم سر وماقدرش أخد قرار في حياتي إلا بالأمر والإذن منهم. 

اقرأ أيضًا: 


معاك عصايا فيها 3 ألوان "أحمر وأخضر وأسود".. إيه سر الألوان ديه؟ 

العصايا ديه أنا اللي عاملها، لأ ديه جاتلي هدية من واحد (محبة)، لون الأحمر لسيدي أحمد البدوي  والأخضر لسيدي إبراهيم الدسوقي واللون لسيدي أحمد الرفاعي. 

معنى كدا إن بتحضر كل الموالد؟ 

3 ألوان أنا بعشقهم، ماعرفش غيرهم أصحاب ولا يهمني كلام الناس أهم حاجة حب الله ورسوله وأهل البيت، ومش بحضر الموالد بس لأ بحضر كل حاجة تخصهم. 


ولماذا ترتدي كل هذه السبح؟ (يرتدي ما يقرب من عشرين سبحة بيديه)

السبحة سر من أسراري ومش عايز أقوله. 

"العشق والحب والسر".. كلمات كررتها كتير معناهم إيه من وجهة نظرك؟ 

الحب والعشق والسر مالهوش كلام محدد ده حاجة بتختلف من شخص للتاني، الناس لو تعرف معنى كلمة "الله". 

طب بتاكل وتشرب منين؟ 

ناس كتير بتسألني أنت إيه اللي مقعدك هنا ليل نهار، وبقولهم "عمرنا ما طلبنا من حد جنيه نفسنا عزيزة علينا أوي إحنا قاعدين عشان حب الله". 

يغمض عينيه ثم يرتعش جسده بشكل مبالغ فيه ويبدو عليه علامات الغضب ويرفض أن يستكمل حديثه معنا مهددًا: "أنا فاصل ومش عايز أتكلم عن أسراري، سيبوني هنا في حالي، حياتي ليا أنا وماحبش حد يدخل فيها؛ لأني لو صحيت من اللي أنا فيه وفوقت هزعل وهيزعلوا منكم، سيبوني مع رب الناس".

المصدر : دوت مصر

دوت مصر

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى

السابق محافظ كفر الشيخ يُحيل 84 طبيباً وممرضاً وإدارياً بمستشفى العبور للتحقيق (صور)
التالى محمد ناصر - مصر النهادرة حلقة الاربعاء 2016/11/30 - الجزء الاول